अभिधानमञ्जरी - मदनादिगणवर्ग - १. मदनवर्ग

एला तुच्छा तुटिनी सूक्ष्मैला द्राविणी तुटिर्बहुला |
बाला कपोतवर्णा गौराङ्गी निस्सटी च स्यात् ||३४||

कैयदेवनिघण्टु - १. ओषधिवर्ग

एला चन्द्रा चन्द्रबला वालैला बहुलात्रुटिः ||१३४०||
सूक्ष्मैला द्राविडी बाला क्षुद्रैला निष्कुटिर्द्विपा | कपोतवर्णा कोरङ्गी त्रिदिवा निस्त्रुटिर्मषी ||१३४१||
सूक्ष्मैला मूत्रकृच्छार्शःश्वासकासकफापहा |१३४२|

धन्वन्तरिनिघण्टु - २. शतपुष्पादिवर्ग

सूक्ष्मैला द्राविडी तुत्था कोरङ्गी बहुला त्रुटिः | एला कपोतवर्णा च चन्द्रबाला च निष्कुटी ||४५||
सूक्ष्मैला मूत्रकृच्छ्रघ्नी श्वासकासक्षये हिता | सूक्ष्मैला शीतला स्वादुहृद्या रोचनदीपनी ||४६||

निघण्टुशेष - १. वृक्षकाण्ड

सूक्ष्मैलायां चन्द्रबाला द्राविणी निष्कुटिस्तुटिः ||३१||
कपोतवर्णिका तुच्छा कोरङ्गी बहुला तुला |३२|

निघण्टुशेषटीका व्याख्या (श्रीवल्लभगणि कृत)

एलयति-मुखदौर्गन्ध्यं प्रेरयति एला, सूक्ष्मा चासौ एला च सूक्ष्मैला, तस्याम्| चन्द्रस्य-कर्पूरस्य बाला-पुत्रीव चमत्कारादिति चन्द्रबाला| द्रावयति-मुखदौर्गन्ध्यमवश्यमिति द्राविणी, आवश्यके णिन्निति णिन्| निष्क्रान्ता कुटेः-कोशाद् निष्कुटिः| तुटत् कलहे तुटति तुटिः, नाम्युपान्त्य-सिद्ध. ५.१.५४] इति किदिः, स्त्रीलिङ्गः| त्रुटत् छेदने रोपान्त्योऽयम्, नाम्युपान्त्य [सिद्ध. ५.१.५४] इति किदिप्रत्यये त्रुटिरित्यपि||३१||

कपोतस्येव वर्णोऽस्याः कपोतवर्णा, स्वार्थिके के कपोतवर्णिका| तुच्छा लघीयसीत्वात्| कुरति-शब्दायते कोरङ्गी, शृङ्ग-शार्ङ्गादयः हैमोणादिसू. ९६] इति गे निपात्यते, गौरादित्वाद् ङीः| बंहते बहुला स्था-वङ्कि-वंहि-हैमोणादिसू. ४७६] इति उलो न लोपश्च; बहूनि पर्णानि लाति वा| तोल्यते तुला, भिदादित्वात् साधुः| आह च–
सूक्ष्मैला द्राविडी तुच्छा कोरङ्गी बहुला त्रुटिः| एला कपोतवर्णा च चन्द्रबाला च निष्कुटिः|| इति|

सूक्ष्मैलानामानि लोके ‘एलची’ इति प्रसिद्धिः|
 

भावप्रकाश-पूर्वखण्ड-मिश्रप्रकरण - ३. कर्पूरादिवर्ग

सूक्ष्मोपकुञ्चिका तुत्था कोरङ्गी द्राविडी त्रुटिः |
एला सूक्ष्मा कफश्वासकासार्शोमूत्रकृच्छ्रहृत् | रसे तु कटुका शीता लघ्वी वातहरी मता ||५५||

मदनपालनिघण्टु - ३. कर्पूरादिवर्ग

एला त्रुटिश्चन्द्रवाला वहुला निष्कुटिस्त्विष |
कपोतवर्णा सूक्ष्मैला कुनटी द्राविडी मता | एला सूक्ष्मा कफश्वासकासार्शोमूत्रकृच्छ्रनुत् ||२४||

मदनपालनिघण्टु - ६. फलादिवर्ग

एलानामामवातघ्नमलोष्णं गुरु रेचनम् | पक्वं स्वादु हिमं बल्यं वातपित्तविनाशनम् ||६५||      

मदनादिनिघण्टु - १. प्रथमगण

सूक्ष्मैला द्राविडी तुच्छा खल्वेला बहुला तुटीः | क्षुद्रैला निष्कुटिः चन्द्रा गर्भविस्राविनी मता ||६२||

माधवद्रव्यगुण - १. विविधौषधिवर्ग

एला तृट्छर्दिहृल्लासकण्डूपित्तकफापहा | सूक्ष्मैला मूत्रकृच्छ्रार्शःश्वासकासकफे हिता ||१३०||

राजनिघण्टु - ६. पिप्पल्यादिवर्ग

एला बहुलगन्धैन्द्री द्रावडी निष्कुटिस्त्रुटिः | कपोतवर्णी गौराङ्गी बाला बलवती हिमा ||८५||
चन्द्रिका चोपकुञ्ची च सूक्ष्मासागरगामिनी | गर्भारिर्गन्धफलिका कायस्थाऽष्टादशाह्वया ||८६||

राजनिघण्टु - ६. पिप्पल्यादिवर्ग

एलाद्वयं शीतलतिक्तमुक्तं सुगन्धि पित्तार्तिकफापहारि |
करोति हृद्रोगमलार्तिबस्तिपुस्त्वघ्नमत्र स्थविरा गुणाढ्या ||८७||

राजवल्लभनिघण्टु - ३. माध्याह्निकपरिच्छेद

एला मूत्रविबन्धघ्नी तृट्छर्दिकफवातजित् ||५७३||

लघुनिघण्टु

सूक्ष्मैला द्राविडी तुत्था कोरङ्गी बहुला त्रुटिः ||७||
एला कपोतवर्णा च चन्द्रबाला तथैन्द्रिका | सूक्ष्मैला कृमिजित् कासश्वासहिक्काप्रमेहहा ||८||

सोढलनिघण्टु - नामसङ्ग्रह (प्रथम भाग) - २. शतपुष्पादिवर्ग

सूक्ष्मायां द्राविडी तुत्था कौरङ्गी बहुला त्रुटिः | एला कपोतवर्णा च चन्द्रवेला च निस्कुटी ||३१३||
ऐन्द्री घृता वयःस्था च सुगन्धा चोपकुञ्चिका |३१४|