कैयदेवनिघण्टु - १. ओषधिवर्ग

लक्ष्मीफलोहृद्यगन्धो गन्धगर्भो महाफलः ||१५||
शैलूषः श्रीगन्धफलो मालूरो गोहरीतकी | वातसारो नीलमल्ली सत्यधर्मो धरारुहः ||१६||
महाकपित्थो धविको रुचीकः सर्वरूपवान् | बिल्वः शलाटः शाण्डिल्यः कर्करो ग्रन्थिलो मतः ||१७||
सदाफलः कृष्णमुखः कण्टकी नीलमल्लिका | बाले त्वस्य फले बिल्वकर्कटी बिल्वपेशिका ||१८||
श्रीफलस्तुवरस्तिक्तो ग्राही रूक्षोऽग्निपित्तकृत् | वातश्लेष्महरस्तस्य पत्रं सङ्ग्राहि वातजित् ||१९||
जटा दोषवमीकृच्छ्रशूलघ्नी मधुरा लघुः | कफवातामशूलघ्नो ग्राहिणी बिल्वपेशिका ||२०||
काण्डं कासामवातघ्नं हृद्यं रुच्यग्निवर्धनम् | बिल्वं कटु कषायोष्णं तिक्तं दीपनपाचनम् ||२१||
स्निग्धं तीक्ष्णं लघु ग्राहि हृद्यं वातकफापहम् | पक्वं विदाहि विष्टम्भि मधुरानुरसं गुरु ||२२||
दोषलं दुर्जरं पूतिवातं ग्राह्यग्निसादनम् | निहन्याद् बिल्वजं पुष्पमतीसारं तृषां वमिम् ||२३||
बिल्वमज्जभवं तैलमुष्णं वातहरं परम् |काञ्जिके संस्थितं बिल्वमग्निसन्दीपनं परम् ||२४||
हृद्यं रुचिकरं प्रोक्तमामवातविनाशनम् |२५|

धन्वन्तरिनिघण्टु - १. गुडूच्यादिवर्ग

बिल्वः शलाटुः शाण्डिल्यो हृद्यगन्धो महाफलः | शैलूषः श्रीफलश्चाह्वः कर्कटः पूतिमारुतः ||१२०||
लक्ष्मीफलो गन्धगर्भः सत्यकर्मा वरारुहः | वातसारोऽरिमेदश्च कण्टको ह्यसिताननः ||१२१||
बिल्वमूलं त्रिदोषघ्नं छर्दिघ्नं मधुरं लघु | बिल्वस्य च फलं चाम्लं स्निग्धं सङ्ग्राहि दीपनम् ||१२२||
कटुतिक्तकषायोष्णं तीक्ष्णं वातकफापहम् | विद्यात्तदेव पक्वं मधुरानुरसं गुरु ||१२३||
विदाहि विष्टम्भकरं दोषहृत्पूतिमारुतम् ||१२४||

भावप्रकाश-पूर्वखण्ड-मिश्रप्रकरण - ४. गुडूच्यादिवर्ग
बिल्व
बिल्वः शाण्डिल्यशैलूषौ मालूरश्रीफलावपि | श्रीफलस्तुवरस्तिक्तो ग्राही रूक्षोऽग्निपित्तकृत् |
वातश्लेष्महरो बल्यो लघुरुष्णश्च पाचनः ||११||

भावप्रकाश-पूर्वखण्ड-मिश्रप्रकरण - ७. आम्रादिफलवर्ग
बिल्व, कपित्थ
बिल्वः शाण्डिल्यशैलूषौ मालूरश्रीफलावपि | बालं बिल्वफलं बिल्वकर्कटी बिल्वपेषिका ||४८||
ग्राहिणी कफवातामशूलघ्नी बिल्वपेशिका | बालं बिल्वफलं ग्राहि दीपनं पाचनं कटु |
कषायोष्णं लघु स्निग्धं तिक्तं वातकफापहम् ||४९||
पक्वं गुरु त्रिदोषं स्याद् दुर्जरं पूतिमारुतम् | विदाहि विष्टम्भकरं मधुरं वह्निमान्द्यकृत् ||५०||
फलेषु परिपक्वं यद्गुणवत्तदुदाहृतम् | बिल्वादन्यत्र विज्ञेयमामं तद्धि गुणाधिकम् |
द्राक्षाबिल्वशिवादीनां फलं शुष्कं गुणाधिकम् ||५१||

मदनपालनिघण्टु - १. अभयादिवर्ग

बिल्वः शलाटुः शैलूषो मालूरश्च सदाफलः | लक्ष्मीफलो गन्धगर्भः शाण्डिल्यः कण्टकी मतः ||४२||
बिल्वं ग्राहि कषायोष्णं कटु दीपनपाचनम् | हृद्यं बल्यं लघु स्निग्धं तिक्तं वातकफापहम् ||४३||
वृष्यं गुरु त्रिदोषं स्याद्दुर्जरं पूतिमारुतम् | विदाहि विष्टम्भकरं मधुरं बह्निमान्द्यकृत् ||४४||
ग्रहणीकफवातामशूलघ्नी बिल्वपेशिका ||४५||

माधवद्रव्यगुण - १. विविधौषधिवर्ग

बिल्वमूलं मरुच्छ्लेष्मछर्दिघ्नं न च पित्तकृत् ||६८||

राजनिघण्टु - ११. आम्रादिवर्ग

बिल्वः शल्यो हृद्यगन्धः शलाटुः शाण्डिल्यः स्याच्छ्रीफलः कर्कटाह्वः |
शैलूषः स्याच्छैवपत्रः शिवेष्टः पत्रश्रेष्ठो गन्धपत्रस्त्रिपत्रः ||१८८||
लक्ष्मीफलो गन्धफलो दुरारुहस्त्रिशाकपत्रस्त्रिशिखः शिवद्रुमः |
सदाफलः सत्फलदः सुभूतिकः समीरसारः शिखिनेत्रसञ्ज्ञितः ||१८९||
बिल्वस्तु मधुरो हृद्यः कषायः पित्तजित् गुरुः |
कफज्वरातिसारघ्नो रुचिकृद्दीपनः परः ||१९०||
बिल्वमूलं त्रिदोषघ्नं मधुरं लघु वातनुत् |
फलं तु कोमलं स्निग्धं गुरु सङ्ग्राहि दीपनम् ||१९१||
तदेव पक्वं विज्ञेयं मधुरं सरसं गुरु |
कटुतिक्तकषायोष्णं सङ्ग्राहि च त्रिदोषजित् ||१९२||

राजवल्लभनिघण्टु - ६. औषधाश्रयपरिच्छेद

बिल्वमूलं मरुच्छ्लेष्मछर्दिघ्नं रक्तपित्तजित् ||१||

सरस्वतीनिघण्टु - १. महावृक्षवर्ग

मालूरः श्रीफलो बिल्वः शाण्डिल्यो नीलमल्लिका ||२||
महाकपित्थः शैलूषो मङ्गल्यः पूतिमारुतः | कर्कोटः श्रीद्रुमो रुद्रः श्रीसञ्ज्ञोऽबहलत्वचः ||३||

 सोढलनिघण्टु - गुणसङ्ग्रह (द्वितीय भाग) - १. गुडूच्यादिवर्ग

बिल्वमूलं मरुत्श्लेष्मछर्दिघ्नं न च पित्तकृत् ||१४९||