चरकसंहिता - सूत्रस्थानम् - २७. अन्नपानविध्यध्यायः

वातश्लेष्मविबन्धघ्नं कटूष्णं दीपनं लघु | हिङ्गु शूलप्रशमनं विद्यात् पाचनरोचनम्||२९९||

अष्टाङ्गहृदयम् - सूत्रस्थानम् - ६. अन्नस्वरूपविज्ञानीयाध्यायः

हिङ्गु वातकफानाहशूलघ्नं पित्तकोपनम्||१५२||
कटुपाकरसं रुच्यं दीपनं पाचनं लघु|

अष्टाङ्गसङ्ग्रहः - सूत्रस्थानम् - १३. अग्र्यसंग्रहणीयः

हिङ्गुनिर्यासश्छेदनीयपाचानीयानुलोमिक वातकफप्रशमनानाम्

सर्वाङ्गसुन्दरी व्याख्या 

हिङ्गु वातादिघ्नं पित्तकोपनं कट्वादिगुणयुक्तं च|

आयुर्वेदरसायनम् व्याख्या 

तत्र हिङ्गुगुणानाह-हिङ्ग्विति|

कैयदेवनिघण्टु - १. ओषधिवर्ग

जरकं जरणं हिङ्गु रामठं सूपधूपकम् ||१२१०||
अगूढगन्धं बाह्लीकं जन्तुघ्नं भूतनाशनम् | हिङ्गूष्णं तिक्तकटुकं रसे पाके च दीपनम् ||१२११||
लघु वातकफानाहशूलगुल्माग्निमान्द्यजित् | पाचनं कृमिहृद्रोगकासश्वासोदरार्तिनुत् ||१२१२||

द्रव्यगुणसङ्ग्रह - ४. लवणादिवर्ग

हिङ्गु तीक्ष्णं कटुरसं शूलाजीर्णविबन्धनुत् | लघूष्णं पाचनं स्निग्धं दीपनं कफवातजित् ||१७||

धन्वन्तरिनिघण्टु - २. शतपुष्पादिवर्ग

हिङ्गु रामठमत्युग्रं जन्तुघ्नं भूतनाशनम् | अगूढगन्धं बाह्लीकं जरणं सूपधूपनम् ||३७||
हिङ्गूष्णं कटुकं हृद्यं सरं वातकफौ कृमीन् | हन्ति गुल्मोदराध्मानबन्धशूलहृदामयान् ||३८||

निघण्टुशेष - २. गुल्मकाण्ड

 हिङ्गौ जतुक-वाल्हीका-ऽगूढगन्धानि रामठम् | सहस्रवेधि भूतघ्नं जरणं सूपधूपनम् ||२६५||

निघण्टुशेषटीका व्याख्या (श्रीवल्लभगणि कृत)

हिण्ट् गति-वृद्ध्योः हिनोति नासां हिङ्गुः, पुं-क्लीबलिङ्गः, हेर्हिन् च [हैमोणादिसू. ७६०] इति गुः, तत्र| जायते जतुकम्, कञ्चुकांशुक [हैमोणादिसू. ५७] इत्युके निपात्यते| वाल्हीके-उदीच्यदेशे भवं वाल्हीकम्, कोपान्त्यात् [सिद्ध. ६.३.५६] इत्यण्| अगूढः-अगुप्तो गन्धोऽस्य अगूढगन्धम्| रमठे-उदीच्यदेशे भवं रामठम्, भवे [सिद्ध. ६.३.१२३] इत्यण्| सहस्रं-बहु वेधयति सहस्रवेधि| भूतान् हन्ति भूतघ्नम्| जीर्यतेऽनेन जरणम्, क्लीबलिङ्गः| सूपस्य-प्रहितस्य धूपनं सूपधूपनम्| आह च–
हिङ्गु रामठमत्युग्रं जन्तुघ्नं भूतनाशनम् | अगूढगन्धं वाल्हीकं जरणं सूपधूपनम्|| [धन्व. वर्ग २ श्लो. ३६] इति|

एतस्य लोके हिङ्गु इति प्रसिद्धिः||२६५||

भावप्रकाश-पूर्वखण्ड-मिश्रप्रकरण - २. हरीतक्यादिवर्ग

सहस्रवेधि जतुकं बाह्लीकं हिङ्गु रामठम् | हिङ्गूष्णं पाचनं रुच्यं तीक्ष्णं वातबलासहृत् |
शूलगुल्मोदरानाहकृमिघ्नं पित्तवर्द्धनम् ||९०||

मदनपालनिघण्टु - २. शुण्ठ्यादिवर्ग

हिङ्गु बाह्लीकमत्युग्रं रामठं भूतनाशनम् | अगूढगन्धा जरणं जन्तुघ्नं सूपभूषणम् ||५०||
हिङ्गूष्णं पाचनं रुच्यं तीक्ष्णोष्णं कफवातनुत् | शूलगुल्मोदरानाहकृमिजित्पित्तवर्धनम् ||५१||

मदनादिनिघण्टु - १८. अष्टादशगण

हिङ्गुरामठमत्युग्रं जन्तुघ्नं भूतनाशनम् | अगूढगन्धं रक्षोघ्नं जरणं सूपधूपनम् ||५||
हिङ्गु वातकफानाहशूलघ्नं पित्तकोपनम् | दीपनं पाचनं रुच्यं कृमिघ्नं कोष्ठरोगजित् ||६|

माधवद्रव्यगुण - १. विविधौषधिवर्ग

लघूष्णं पाचनं हिङ्गु दीपनं कफवातनुत् | स्निग्धं तीक्ष्णं कटुरसं शूलाजीर्णविबन्धनुत् ||५८||

राजनिघण्टु - ६. पिप्पल्यादिवर्ग

हिङ्गूग्रगन्धं भूतारिर्वाह्लीकं जन्तुनाशनम् | शूलगुल्मादिरक्षोघ्नमुग्रवीर्यं च रामठम् ||७२||
अगूढगन्धं जरणं भेदनं सूपधूपनम् | दीप्तं सहस्रवेधीति ज्ञेयं पञ्चदशाभिधम् ||७३||
हृद्यं हिङ्गु कटूष्णं च क्रिमिवातकफापहम् | विबन्धाध्मानशूलघ्नं चक्षुष्यं गुल्मनाशनम् ||७४||

राजवल्लभनिघण्टु - ३. माध्याह्निकपरिच्छेद

हिङ्गु तीक्ष्णं कटुरसं शूलाजीर्णविबन्धनुत् | लघूष्णं पाचनं स्निग्धं दीपनं कफवातजित् ||४३१||

लघुनिघण्टु

हिङ्गु रामठमत्युग्रं जन्तुघ्नं भूतनाशनम् | अगूढगन्धं बाह्लीकं भेदनं सूपधूपनम् ||७१||
हिङ्गु वातकफानाहशूलघ्नं पित्तकोपनम् |७२|

सरस्वतीनिघण्टु - ५. चन्दनादिवर्ग

सहस्रवेधी जतुकं बाह्लीकं हिङ्गु रामठम् | विषघ्नं शूलहृच्चाथ रक्षोघ्नं सूपधूपनम् ||५६||

सोढलनिघण्टु - गुणसङ्ग्रह (द्वितीय भाग) - २. शतपुष्पादिवर्ग

हिङ्गु वातकफानाहशूलघ्नं पित्तकोपनम् | कटुपाकरसं रुच्यं दीपनं पाचनं लघु ||२८२||
पित्तास्रकोपि स्निग्धोष्णं विबन्धाजीर्णनाशनम् | बोष्काणदेशजं श्रेष्ठं ततो न्यूनगुणं परम् ||२८३||